RUS
SMARTNEWS.KZ басылымының хабарлауынша, ҚР Сыртқы істер министрлігінің ресми өкілі Айбек Смадияров журналистердің Ақжарқын Тұрлыбай ісіне қатысты сұрағына жауап берді.
СІМ өкілі қызды елге қайтару бойынша барлық қажетті шаралар қабылданғанын, енді бұл іспен Бас прокуратура айналысып жатқанын мәлімдеді:
“Бас прокуратура желісі бойынша жұмыс атқарылып жатыр. Қажеттінің барлығын жасадық. Әрі қарай Бас прокуратура ақпарат алмасу бойынша жұмыс істейді”, – деді Смадияров.
Сонымен қатар ол елшілік қызметкерлері Ақжарқынмен кездескенін растады. Оның айтуынша, бұл – Қазақстан елшілерінің жыл сайынғы міндеті:
“Иә, бұл біздің елшінің жыл сайынғы міндеті — шетелдерде түрмеде отырған азаматтарға бару. Сондықтан жұмыс атқарылып жатыр”, - деді ол.
Еске сала кетейік, Ақжарқын Тұрлыбай 2014 жылы Қытайда есірткі тасымалдады деген күдікпен ұсталып, өмір бойына бас бостандығынан айырылған. Оның ісі әлі күнге дейін қазақстандық қоғамда жоғары резонанс тудырып келеді.