RUS
SMARTNEWS.KZ басылымының хабарлауынша, 2025 жылдың соңына дейін Каспий теңізінде халықаралық круиздік лайнер іске қосылады. Бұл туралы ҚР Туризм және спорт министрлігіне қарасты Туризм индустриясы комитеті хабарлады.
Ведомствоның мәліметінше, Маңғыстау облысы круиздік туризмді дамыту үшін үлкен әлеуетке ие. Осы бағытта Ақтау мен Құрық порты аралығындағы жағалау аймағында теңіз курорттары мен жағажайлық демалыс орындары дамытылады. Бұл мақсатта жаңа инфрақұрылым нысандары – қонақүйлер мен тақырыптық ойын-сауық паркі салынады.
Круиздік бағытқа ресейлік "су бетіндегі бес жұлдызды қонақүй" үлгісіндегі лайнер қосылады деп жоспарланып отыр. Ол Каспий маңындағы бірнеше портқа аялдайды: Ақтау (Қазақстан), Астрахань және Махачкала (Ресей), Түрікменбашы (Түрікменстан), Энзели, Ноушехр және Амирабад (Иран), Баку (Әзербайжан).
Лайнер алғашқы сынақ рейсін жыл соңына дейін, пайдалануға беру актісі алынған соң жүзеге асырады.
Сонымен қатар, круиздік маршруттарды дамыту мақсатында Каспий жағалауындағы елдермен келісімдер әзірленуде. Бұған дейін Әзербайжанмен (2020 ж.) және Иранмен (2019 ж.) келісім жобалары бастамаланған. Қазіргі таңда басқа да жағалаудағы мемлекеттердің ұстанымы күтілуде.
Комитет жобалар тек жеке инвестициялар арқылы жүзеге асырылатынын атап өтті. Мемлекеттік бюджеттен қаржы бөлу жоспарланбаған.