Салыққа тоймаған Трамп енді болат пен алюминий импортына баж салығын екі есеге арттырды

SMARTNEWS.KZ басылымының хабарлауынша, АҚШ президенті Дональд Трамп болат пен алюминийге салынатын баж салығын 25%-дан 50%-ға дейін көтеру туралы Жарлыққа қол қойды. Бұл туралы Ақ үй хабарлады.

Жаңа тариф 4 маусымнан бастап күшіне енеді және «әділетсіз саудаға» қарсы АҚШ-тың болат және алюминий саласын қорғауға бағытталған.

Ақ үйдің мәліметінше, кейбір елдер өз өнеркәсіптерін субсидиялау арқылы АҚШ-қа арзан металл экспорттап, жергілікті өндірушілерге қысым жасап отыр. Соның салдарынан:

• АҚШ-тың болат өнеркәсібінің қуаттылықты пайдалану деңгейі
  2021 жылы 80%-дан → 2023 жылы 75,3%-ға дейін төмендеген.

Ұлыбритания — бұл өзгерістен әзірге зардап шекпейтін жалғыз ел. Оның тарифі 25% деңгейінде сақталады. Бірақ, 9 шілдеден бастап бұл келісім де қайта қаралуы мүмкін.

Айта кетейік, бұған дейін АҚШ Қытайдың кейбір тауарларына салынатын тарифтерді 31 тамызға дейін тоқтатқан болатын.