RUS
SMARTNEWS.KZ басылымының хабарлауынша, АҚШ президенті Дональд Трамптың сенат қарауындағы салық және бюджет жөніндегі заң жобасы Илон Масктың қатаң сынына ұшырады.
Tesla және SpaceX компанияларының негізін қалаушы, Трамптың сайлауалды науқанын қолдаған миллиардер заңды "отвратительная мерзость" деп сипаттап, бұрынғы саяси серіктесін ашық сынға алды.
Бұл Масктың Трамп әкімшілігіндегі рөлінен бас тартқаннан кейінгі алғашқы өткір мәлімдемесі. Ол былтыр үкіметтің тиімділігін арттыру жөніндегі "арнайы кеңесші" ретінде Ақ үйге шақырылған болатын. Алайда өткен аптада миллиардер өз еркімен қызметтен кетті, ал басты себеп – бюджеттік саясатқа келіспеушілік.
Илон Маск сын пікірлерін өзінің X әлеуметтік желісіндегі жазбасында білдірді. Ол Трамп ұсынып отырған заң жобасын "сайлаушыларды сатып алуға арналған популистік әрекет" деп бағалады.
"Бұл заң жобасы АҚШ-тың бюджет тапшылығын 2,5 триллион долларға дейін ұлғайтады. Америкалықтарды қарыз қамытына матайды", – деп жазды Маск.
"Оны қолдағандардың бәріне – ұят! Сендер оның дұрыс еместігін білесіңдер", – деп қосты ол.
Заң жобасы 2017 жылы Трамп тұсында енгізілген салық жеңілдіктерінің мерзімін ұзартуды көздейді. Сонымен қатар, жаңа жеңілдіктер мен шығындарды қарастырады, олардың қатарында шекара күзетін күшейту, мигранттарды депортациялау және ұлттық қауіпсіздікке жұмсалатын қаржыны арттыру бар.
Алайда, шығындарды жабу мақсатында заң жобасы бірқатар әлеуметтік бағдарламаларды қысқартуды ұсынады. Атап айтқанда, аз қамтылғандар үшін Medicaid медициналық сақтандыруына бөлінетін қаржы азайтылып, электромобиль саласына берілетін субсидиялар қысқарады. Бұл Tesla-ға тікелей әсер етуі мүмкін.
Дональд Трамп аталмыш бастаманы "Big Beautiful Bill" (Үлкен әрі әдемі заң) деп атаған. Ал тәуелсіз сарапшылар бұл құжат келесі онжылдықта АҚШ бюджетіне 2-4 триллион доллар көлемінде қосымша тапшылық алып келуі мүмкін екенін ескертуде.
Бюджеттің төменгі палатада қабылдануы бір ғана дауыс айырмашылығымен жүзеге асқан. Енді Сенат та, республикалық партияның бақылауында тұрғанымен, жобаның кей бөлімдерін қайта қарауы мүмкін.
Маск бұған дейін Трамптың технологиялық серіктесі ретінде аталып, жасанды интеллект, цифрлық үкімет және киберқауіпсіздік мәселелері бойынша Ақ үймен тығыз жұмыс істеген. Енді ол саясаттан толығымен кетіп, тек бизнесіне назар аударатынын мәлімдеді.
Осылайша, Трамптың ең ықпалды одақтастарының бірі енді оның ең басты сыншыларының біріне айналып отыр.