RUS
SMARTNEWS.KZ басылымының хабарлауынша, АҚШ президенті Дональд Трамп пен Ресей президенті Владимир Путин сәрсенбі кешке телефон арқылы сөйлесті. Бұл туралы Ақ үй мен Кремль хабарлады.
Трамп әңгіме «жақсы өткенін», бірақ «жедел бейбіт келісімге әкелмейтінін» мәлімдеді. Оның айтуынша, Путин Ресей аэродромдарына жасалған шабуылдарға жауап беретінін қатаң түрде ескерткен.
«Президент Путин бұған өте нақты жауап беретінін айтты», – деді Трамп. Сонымен қатар, екі ел басшылары Иранмен жүргізіліп жатқан келіссөздерді де талқылаған.
Ресей президентінің көмекшісі Юрий Ушаковтың айтуынша, қос тарап америкалық-ресейлік ынтымақтастықты қалпына келтіру мәселелерін қарастырған.
«Президенттер әртүрлі саладағы екіжақты ынтымақтастықтың келешегі зор екенін атап өтті», – деді Ушаков.
Оның сөзінше, Трамп Иранның ядролық бағдарламасына қатысты келіссөздерде Ресейдің ықпалы қажет болуы мүмкін екенін білдіріп, Мәскеуден бұл бағытта қолдау сұраған.
Сондай-ақ, Украина мәселесі бойынша жоғары деңгейдегі байланыстарды жалғастыруға уағдаластық жасалған. Тараптар Ресей аэродромдарына жасалған дрон шабуылдарын да талқылаған. Ушаковтың айтуынша, АҚШ бұл операция туралы алдын ала хабарланбағанын Трамп ерекше атап өткен.
Бұған дейін Путин Украина билігін "терроризмге" барды деп айыптап, келіссөздерді тоқтататынын ескерткен еді. Ол Курск пен Брянск облыстарындағы көпірлердің жарылуын террористік акт ретінде сипаттады.
«Террорға сүйенетіндермен қандай келіссөз жүргізуге болады?» – деді Путин.
Айта кетейік, дүйсенбі күні Стамбулда Украина мен Ресей арасындағы келіссөздердің екінші раунды өткен. Нақты нәтижеге қол жеткізілмегенімен, тараптар тұтқындармен алмасуға келіскен. Украина делегациясы Ресейге күштеп әкетілген балалардың тізімін тапсырған.
«Бұл – Ресей заңсыз депортациялаған жүздеген бала. Енді жауап күтеміз. Доп – Ресей алаңында», – деп жазды Украина президенті кеңсесінің басшысы Андрей Ермак.