RUS
SMARTNEWS.KZ басылымының хабарлауынша, Солтүстік Корея басшысы Ким Чен Ын Пхеньянда Ресейдің Қауіпсіздік кеңесінің басшысы Сергей Шойгумен кездесіп, КХДР-дің Мәскеуге, соның ішінде Украинадағы соғыста да қолдау көрсететінін мәлімдеді. Бұл туралы 4 маусымда Кореяның орталық телеграф агенттігі (ЦТАК) хабарлады.
Ким Чен Ын Ресейдің сыртқы саясаттағы ұстанымын "толық әрі сөзсіз" қолдайтынын атап өтті. Ол Украинадағы соғысты "әділ әрі қасиетті іс" деп атап, Ресейге жеңіс тіледі.
Кездесу барысында тараптар Курск облысындағы әскери операцияларды талқылады. Солтүстік Корея мен Ресей ақпарат көздерінің хабарлауынша, бұл аймақта КХДР сарбаздары Ресей әскерінің қатарында Украина Қарулы күштеріне қарсы ұрыстарға қатысқан. Ресей Қауіпсіздік кеңесі сол операцияда қаза тапқан корей сарбаздарының ерлігін мәңгі есте қалдыру мәселесі де көтерілгенін мәлімдеді.
ЦТАК мәліметінше, екі тарап 2024 жылғы маусымда Путиннің Пхеньянға сапары кезінде қол қойылған стратегиялық әріптестік жөніндегі келісімге сүйеніп отыр. Құжатта тараптардың біріне қарулы шабуыл жасалған жағдайда, екіншісі әскери және өзге де қолдау көрсететіні көзделген.
2024 жылдың күзіне қарай КХДР әскери қызметкерлері Курск облысына жіберілгені айтылды. Алғашында Ресей билігі бұл ақпаратты теріске шығарған. Алайда 2025 жылғы сәуірде бұл деректі алдымен Ресейдің Қорғаныс және Сыртқы істер министрліктері, кейіннен президент Путиннің өзі растады.
Сергей Шойгу бұған дейін де Пхеньянға 2023 жылғы шілдеде барған болатын. Сол сапарында тараптар әскери ынтымақтастық мәселелерін талқылағаны туралы болжамдар айтылған еді.