RUS
SMARTNEWS.KZ басылымының хабарлауынша, Ресейде өзін жасөспірім кезінде жаттықтырушысы тарапынан ұзақ уақыт бойы жыныстық зорлық көргенін мәлімдеген Людмила есімді әйел азаматтық сотта жеңіске жетіп, бұрынғы бапкерінен 1,5 миллион рубль (9 млн теңге) өндіруге қол жеткізді. Бұл туралы Ростов облыстық соттарының біріккен баспасөз қызметі мәлімдеді.
Жәбірленушінің айтуынша, зорлық-зомбылық 14 жасында басталып, бірнеше жылға созылған. Сол уақытта жаттықтырушысы 32 жаста болған. Алғашында ол жас спортшыға жаттығу кезінде тиісе бастаған, кейін бұл әрекеттер интимдік қатынасқа ұласқан.
«Мен оған тәуелді болдым, спорттағы болашағым тек соған байланысты деп ойладым. Қарсы тұрудан қорықтым», – дейді Людмила.
Қарым-қатынас тоқтағаннан кейін де, бапкер спортшы қызға қысым көрсетуді жалғастырған. Ол жарыстарға қатыса алмауы мүмкін екенін айтып, қорқытқан.
Тек араға көп жыл салып, 32 жасында Людмила құқық қорғау органдарына жүгініп, тергеу басталды. Оның айтуынша, ол жалғыз емес – іс барысында басқа да жәбірленуші қыздар анықталған. Кейбірінің жасы небәрі 8-де болған.
«Ол қыздардың сеніміне кіріп, “бұл жаттығудың бір бөлігі”, “бұл – махаббат” деп, сананы улады», – дейді Людмила.
Алайда қылмыстық іс мерзімінің өтіп кетуіне байланысты 2025 жылдың қаңтарында жабылды. Дегенмен, азаматтық іс қаралып, сот экс-жаттықтырушыны Людмилаға 500 мың рубль моральдық шығын және 957 мың рубль материалдық залал ретінде өтеуге міндеттеді. Қазіргі таңда шешім заңды күшіне енген жоқ.
Людмила өзінің ұзақ жылдар бойы психологиялық жарамен өмір сүріп келе жатқанын жасырмайды. Қазір ол – спорттық заңгер әрі жаттықтырушы. Бірақ жеке өмірінде сенім мәселесі шешілмеген күйінде қалған.
«Ол менің өмірімді құртты. Қазір психологпен жұмыс істеп жатырмын», – дейді ол.
Сотталған жаттықтырушы өз кінәсін мойындаған жоқ. Людмила болса, бұл істе бастысы – ақша емес екенін айтады. Оның басты мақсаты – мұндай жағдайларды жазасын қалдырмау екенін айтты.