RUS
SMARTNEWS.KZ басылымының хабарлауынша, Әлеуметтік желіде Елиссей есімді жігіт өзіне жыныстық зорлық көрсетілгенін айтып, бейнежазба жариялады. Оның айтуынша, оқиға биыл 24 наурызда болған.
"Таңертең, түнгі ауысымнан кейін, қауіпсіз деп есептелетін, сіздер үнемі мақтап отыратын AMIR Project негізін қалаушы Амир мені клубтағы кабинетте зорлады. Біз екеуіміз де шегіп алғанбыз, не болып жатқанын түсінбедім. Қарсыласуға қауқарым болмады. Осы оқиғадан бері екі жарым айдай уақыт өтті. Осы уақыт ішінде аман қалуға тырыстым", – деді ол видеода.
Елиссейдің айтуынша, ол өз өмірі үшін қорқып, үнсіз жүруге мәжбүр болған.
"Қалай өмір сүрерімді білмедім. Айналама да, айнадағы өз бейнеме де қарай алмадым. Бұл өте ауыр әрі қорқынышты. Қазір де айту оңай емес. Бірақ мен бұл бейнені Амирді айыптау үшін жариялап отырмын. Өйткені бұл — кешірілмейтін нәрсе. Мұны жай кешіріммен жабуға болмайды. Мен кешіре алмаймын", – деді ол.
Алматы қалалық полиция департаментінің мәліметінше, аталған факті әлеуметтік желіге мониторинг жасау барысында анықталған.
"Медеу аудандық полиция басқармасы бұл дерек бойынша Қылмыстық кодекстің 120-бабы (Зорлау) бойынша қылмыстық іс қозғады. Жәбірленуші полицияға ресми арыз жазды. 29 жастағы күдікті — сол клубтың басшысы уақытша ұстау изоляторына қамалды", – деп хабарлады ведомство.
Қазір оқиғаға байланысты қажетті тергеу амалдары жүргізіліп жатыр.
"Тергеу барысында күдіктінің әрекетіне, оның ішінде арызда көрсетілген барлық мән-жайға құқықтық баға беріледі", – деді полиция.
Іс Алматы қалалық полиция департаменті басшылығының ерекше бақылауына алынған.