RUS
SMARTNEWS.KZ басылымының хабарлауынша, Астанадағы су қоймасы 55 жыл ішінде алғаш рет кешенді түрде тазартылып жатыр. Жұмыстарды Су ресурстары және ирригация министрлігінің қолдауымен «Қазсушардың» Ақмола облыстық филиалы жүргізуде.
Министрліктің мәліметінше, тазарту процесіне екі арнайы техника жұмылдырылған:
– Сағатына 2000 текше метр шөгіндіні сорып шығаратын ірі жер снаряд;
– Сағатына 900 текше метрге дейін қуаты бар көпфункционалды, өздігінен жүретін шағын жер снаряд.
2024 жылы су қоймасынан 50 мың тонна лай шығару жоспарланған. Жұмыс қазан айының соңына дейін жалғасып, келесі 13 жыл бойы жыл сайын жүргізілмек.
Тазарту нәтижесінде су қоймасының сыйымдылығы 47 миллион текше метрге артады. Бұл елорданың ауызсу қорын көбейтіп, су тапшылығын азайтуға сеп болады.
Су қоймасы 1970 жылы пайдалануға берілген және осы уақыт ішінде түбін тазалау алғаш рет қолға алынып отыр.
"Президент тапсырмасына сәйкес арнайы мамандар тобы құрылып, техникамен жұмыс істеуге оқытудан өтті. Астана су қоймасы – стратегиялық маңызды нысан. Қазіргі заманғы техниканың арқасында 50 жылдан кейін алғаш рет толық тазартуға мүмкіндік туды", – деді Су ресурстары және ирригация министрі Нұржан Нұржігітов.