RUS
SMARTNEWS.KZ басылымының хабарлауынша, ІІМ Киберқылмысқа қарсы іс-қимыл департаменті мен ҰҚК бірлесіп, қазақстандықтардың жеке мәліметтерін заңсыз сатумен айналысқан қылмыстық топтың жолын кесті. Бұл туралы Polisia.kz хабарлады.
Ішкі істер министрлігінің мәліметінше, ақпараттар мемлекеттік дерекқорлардан заңсыз алынған және Telegram арналары арқылы таратылған, кей жағдайларда коллекторлық компанияларға да берілген.
"140-тан астам адам, соның ішінде компания иелері мен арна әкімшілері ұсталды. Қазіргі таңда 5 күдікті қамауда. Тінту кезінде 400-ден аса компьютер мен электронды техника тәркіленді," – деді ІІМ Киберқылмысқа қарсы департаментінің басшысы Жандос Сүйінбай.
Осы іске байланысты Қылмыстық кодекстің мына баптары бойынша тергеу басталды:
205-бап, 3-бөлік – ақпараттық жүйеге заңсыз кіру,
147-бап, 5-бөлік – жеке өмірге қол сұғу және деректерді заңсыз тарату,
211-бап, 3-бөлік – шектеулі электрондық ресурстарды заңсыз тарату.
"Қазіргі кезде бұл қылмыстық әрекетке қатысы бар барлық адамдарды анықтау жұмысы жүріп жатыр," – деп қосты Жандос Сүйінбай.