8-сынып оқушылары қатарласын тапаншамен қорқытып, ұрып-соққан

SMARTNEWS.KZ басылымының хабарлауынша, Ресейдің Екатеринбург қаласында жасөспірімдер арасында болған сұмдық оқиға жұртты шошытты.

Әлеуметтік желіде тараған видеода мектеп оқушысының белгісіз ғимарат ішінде тізерлеп тұрып, тапаншаға ұқсас затпен қорқытылғаны және кешірім сұрап жатқаны көрінеді.

— Мен [оқушының аты] алдында кешірім сұраймын, себебі... – деген сәтте, жәбірленуші сөзін аяқтай алмайды. Сол сәтте басқа оқушы оған тап беріп, ұруды бұйырады.

— Қажеті жоқ... – деп жалбарынады тізерлеп тұрған жасөспірім.

Алайда бір сәтте оның оң жағында тұрған екінші бала оны аяғымен ұрады, артынша екеуі бірігіп ұрып-соғып, кейін оқиға орнынан кетіп қалады.

Оқиға "Бандитский центр [ЕКБ]" атты топта жарияланған. Видео авторларының айтуынша, бұл – сегізінші сынып оқушылары. Алғашқыда екі бала арасында жанжал туындаған, артынша біреуі достарын қарумен ертіп келіп, қатарласын жабылып соққыға жыққан.

Ресейдің Тергеу комитеті бұл оқиғаға байланысты «бұзақылық» (Қылмыстық кодекс 213-бабы) және «бостандықтан заңсыз айыру» (127-бап) баптары бойынша қылмыстық іс қозғады.

— Алдын ала мәліметтерге сүйенсек, екі жасөспірім қатарласын тізерлетіп қойып, тапаншаға ұқсас затпен қорқытып, ұрып-соққан. Қазіргі уақытта оқиғаға куә болғандар мен оқушылардың ата-аналары анықталып, тергеліп жатыр. Жәбірленушінің денсаулығына келген зиянның деңгейі де анықталуда, — деп хабарлады Свердлов облысы тергеу комитетінің өкілі Александр Шульга.

Сонымен қатар, қатысушыларға қатысты мінездемелік деректер жинақталып жатыр. Оқиғаның себептері мен оған алып келген жағдайлар тексерілуде.