RUS
SMARTNEWS.KZ басылымының хабарлауынша, жас әрі дарынды боксшы Төрехан Сабырхан алдағы уақытта да ел ішіндегі жарыстарда туған қаласы – Шымкенттің атынан өнер көрсететінін мәлімдеді. Бұл жайлы спортшы өз Instagram парақшасында жариялады.
Оның айтуынша, бұған дейін Атырау облысына ауысатынын хабарлағанымен, жағдай өзгерген. Себебі оны Атырауға шақырған Бауыржан Кәрімов жуырда Шымкент бокс федерациясының вице-президенті қызметіне тағайындалған. Осы өзгерістен кейін қос тарап кездесіп, бір шешімге келген.
"Ассалаумағалейкум қазақ елі! Мен ары қарай да Шымкенттік намысын қорғаймын!
Иә, осыған дейін Атырау облысына ауысамын деп хабарлаған ем. Ол жаққа мені Бауыржан Кәрімов ағам шақырған. Жақында ол кісі Шымкент бокс федерациясының вице-президенті қызметіне келді.
Жаңа қызметіне келе салысымен біз кездесіп, әңгімелестік. Оның қорытындысы бойынша мен Шымкентте қала беретін болдым.Бұған дейін айтқанымдай, мен тек ішкі біріншілікте жеке бір өңірдің намысын қорғаймын. Ал шет елге шыққанда Қазақстанның көк туын көтеремін.
Қолдау білдіріп отырған барлығыңызға рақмет. Ел намысын абыроймен қорғау үшін тынбай еңбектенемін!" – деп жазды Сабырхан.
Айта кетейік, Төрехан Сабырхан – 2006 жылы Шымкентте дүниеге келген. Ол – жасөспірімдер мен жастар арасындағы жарыстарда төрт рет Азия чемпионы атанған тұңғыш қазақстандық боксшы. 2024 жылы Черногорияның Будва қаласында өткен жастар арасындағы әлем чемпионатында топ жарды.
Сол жылы желтоқсанда ересектер қатарына өткен Сабырхан 2025 жылдың наурызында Болгарияда өткен Странджа кубогының жеңімпазы атанды. Жақында ғана Бангкок қаласында өткен Thailand Open халықаралық турнирінде 70 келі салмақ дәрежесінде алтын медаль иеленді.