RUS
SMARTNEWS.KZ басылымының хабарлауынша, Иран барлау министрі Эсмаил Хатиб Тегеран Израильдің ядролық нысандарына қатысты құпия құжаттарды қолға түсіргенін мәлімдеді. Алайда Иран тарапы бұл мәлімдемеге нақты дәлел ұсынбады.
Министрдің айтуынша, құжаттарда Израильдің қорғаныс әлеуеті, сондай-ақ АҚШ пен Еуропамен байланысына қатысты мәліметтер бар. Хатиб бұл құжаттарды "стратегиялық қазына" деп атап, Иранның шабуылдаушы әлеуетін күшейтетінін айтты. Оның сөзіне қарағанда, жақын арада бұл құжаттардың бір бөлігі жариялануы мүмкін.
Айта кетейік, 2022 жылы АҚШ Қаржы министрлігі Хатибті кибершпионажға қатысы бар деген айыппен санкция тізіміне енгізген болатын.
Иран ядролық қару жасауға ұмтылып жатыр деген айыпты Батыс елдері бірнеше жылдан бері айтып келеді. Тегеран бұл мәлімдемелерді жоққа шығарып, өзінің ядролық бағдарламасы тек бейбіт мақсатта екенін алға тартады.
Маусым айының басында АҚШ президентінің арнайы өкілі Стивен Уиткофф Иранға ядролық бағдарлама бойынша егжей-тегжейлі ұсыныс жолдаған. Құжатта Иранға уранды төмен деңгейде байытуға уақытша рұқсат беру қарастырылған. Алайда 7 маусымда АҚШ президенті Дональд Трамп Иран уран байытуды тоқтатпаса, салдары ауыр болатынын ескертті.
Өз кезегінде Иранның рухани көшбасшысы аятолла Әли Хаменеидің айтуынша, АҚШ ұсынған шарттар елдің мүддесіне қайшы. 9 маусымда Иран Сыртқы істер министрлігінің өкілі ядролық келісім бойынша АҚШ-қа қарсы ұсынысты Оман арқылы жолдайтынын хабарлады.