RUS
SMARTNEWS.KZ басылымының хабарлауынша, Шымкентте жанжалдасып жатқан ата-анасын ажыратуға тырысқан қыз әкесінің қолынан жарақат алды. Қылмыстық іс қаланың қылмыстық істер жөніндегі мамандандырылған ауданаралық сотында қаралды.
Іс материалдарына сәйкес, оқиға 2025 жылдың мамыр айында болған. Ер адам әйелімен ұрысып жатқан сәтте араша түскен қызына дене жарақатын келтірген. Оған Қылмыстық кодекстің 108-1-бабы 1-бөлігі бойынша (денсаулыққа қасақана жеңіл зиян келтіру) айып тағылды.
Айыпталушы кінәсін мойындап, жәбірленуші қызымен татуласқанын айтты. Қыз да әкесін кешіріп, істі тоқтатуды сұрады. Сот тараптардың татуласуын және келтірілген зиянның өтелуін ескере отырып, ҚК-нің 68-бабы 1-бөлігіне сәйкес істі тоқтатты. Қаулы заңды күшіне енді.