RUS
SMARTNEWS.KZ басылымының хабарлауынша, Ресей үкіметі «шетел агенттері» туралы заңды қатаңдататын заң жобасын мақұлдады. Жаңа ереже бойынша, «шетел агенті» деп танылған тұлғаға әкімшілік айыппұл салынған соң, бірден қылмыстық іс қозғалуы мүмкін. Бұрын бұл тек бір жыл ішінде екі рет айыппұл салынғанда ғана қолданылатын.
Заң жобасын Мемлекеттік думадағы шетелдік араласу фактілерін тергеу жөніндегі комиссия әзірлеген. Комиссияны Василий Пискарев басқарады. Құжатты Жоғарғы сот мақұлдады, енді Мемдума қарауына өтеді.
2025 жылғы 9 маусымдағы жағдай бойынша Ресей Әділет министрлігінің тізімінде 1012 «шетел агенті» тіркелген. Медиазона басылымының мәліметінше, олардың 342-сіне әкімшілік айыппұл салынған. Заң күшіне енсе, осы тұлғалардың бәріне бірден қылмыстық іс қозғалуы мүмкін. Ал 173 адамға екі рет айыппұл салынған, 68-іне қатысты қылмыстық іс қозғалған.
Олардың арасында саясаттанушы Екатерина Шульман, әнші Монеточка және рэпер Noize MC болуы мүмкін. Оларды «шетел агенті» мәртебесін көрсететін белгі — «плашка» болмағаны үшін айыптаған.
Заң жобасында бұдан бөлек:
бұзушылықтарды жыл сайын «нөлдеу» тәртібін алып тастау;
Ресей мойындамаған халықаралық ұйымдармен жұмыс істеген тұлғаларды да «шетел агенті» деп тану;
әскери-техникалық салаға қатысты ақпарат жинағандарды да осы санатқа қосу қарастырылған.
Айта кетейік, 2012 жылы алғаш қабылданған заң бойынша «шетел агенті» мәртебесі шетелден қаржыландырылатын ұйымдарға ғана берілетін. Қазір бұл мәртебеге саясаткерлер, журналистер, музыканттар мен құқық қорғаушылар да ілігіп жатыр.