RUS
SMARTNEWS.KZ басылымының хабарлауынша, Алматы облысында зейнетақы қорынан ақша шешіп алуға көмектесемін деп сендірген алаяқ әйел 40-тан астам адамды тақырға отырғызған.
Облыстық полиция департаментінің мәліметінше, 35 жастағы Алматы тұрғыны Еңбекшіқазақ ауданының зейнет жасындағы тұрғындарына «зейнетақы жинағыңды шешіп алуға көмектесемін» деп уәде беріп, ірі көлемде ақша алған. Қазірге дейін анықталған шығын көлемі 1,5 миллион теңгеден асып кеткен.
«Қазір 40-тан астам алаяқтық фактісі тіркелді. Жедел іздестіру барысында күдікті ұсталып, сотқа дейінгі тергеу амалдары басталды», – делінген полиция хабарламасында.
Тергеу барысында күдіктінің бұдан да басқа қылмыстарға қатысы бар-жоғы анықталуда.
Айта кетейік, бұған дейін Астана тұрғыны шетел визасы мен тұруға рұқсат аламын деп, алаяққа 20 миллион теңгесін берген.