RUS
SMARTNEWS.KZ басылымының хабарлауынша, желіде Қорғаныс министрі болған Руслан Жақсылықовтың қамауға алынғаны туралы ақпарат тарады. Ақпаратты экс-министр Tengrinews.kz сайтына берген жауабында жоққа шығарды.
Жақсылықов 2025 жылғы 8 маусымда Қорғаныс министрі қызметінен босатылған болатын. Ашық дереккөздерде жарияланған мәлімет бойынша, кейбір Telegram арналары 10 маусымда оның тергеуге алынғанын және Астана қаласындағы уақытша ұстау изоляторына қамалғанын жарыса жазды. Алайда ақпарат жалған боп шықты.
- Бұл жалған, - деп хабарлады ол Tengrinews.kz тілшісіне телефон арқылы.
Қазір ол Астанадағы үйінде отбасымен бірге түскі ас ішкелі жатқанын айтты.
Сондай-ақ ол жалған ақпарат таратқандарға сотқа арыз түсіретінін ескертті.
Еске салайық, 2022 жылдың басында газ бағасына қойылған шектеудің алынып тасталуына байланысты туындаған наразылықтар Қаңтар көтерілісіне ұласқаннан кейін Руслан Жақсылықов Қазақстанның Қорғаныс министрі болып тағайындалған еді. Оған дейін ол Ішкі істер министрінің орынбасары әрі Ұлттық ұланның қолбасшысы қызметін атқарған.
Артынша 2024 жылдың ақпанында Мемлекет басшысының жарлығымен Руслан Жақсылықов қайтадан Қорғаныс министрі лауазымына тағайындалған.
Жақсылықов министрлікті басқарған кезінде Қарулы күштерде әскери қызметшілердің қаза табуы мен өзіне қол жұмсауы сияқты бірқатар қайғылы оқиға орын алып, қоғамда резонанс тудырған. Осы жайттар министрлікке сын айтылуына себеп болды. Алайда, ресми түрде оның қызметінен босатылу себебі жарияланған жоқ.