RUS
SMARTNEWS.KZ басылымының хабарлауынша, Ақмола облысында мемлекетке қайтарылған активтердің есебінен салынған екі жаңа медициналық нысан халыққа қызмет көрсете бастады. Бұл жобалар Президенттің әлеуметтік инфрақұрылымды дамыту жөніндегі тапсырмасын іске асыру аясында жүзеге асқан.
Атап айтқанда, Аршалы ауданына қарасты Арнасай ауылында дәрігерлік амбулатория, ал Бұланды ауданы Алтынды ауылында фельдшерлік-акушерлік пункт ашылды. Нысандарды салуға Арнаулы мемлекеттік қордан 295 млн теңге бөлінген.
Арнасайдағы амбулатория 2 мыңнан астам адамға қызмет көрсетеді. Заманауи жабдықталған мекемеде бір ауысымда 45 адам қабылданады. Мұнда ЭКГ, дефибриллятор, оңалту және физиотерапия құрылғылары орнатылған.
Ал Алтындыдағы медициналық пунктке бес ауылдың – Алтынды, Алакөл, Жаңаталап, Елтай және Боярка тұрғындары қарасты. Мұнда да жаңа медициналық құралдар орнатылып, халыққа алғашқы көмек көрсету сапасы жақсара түсті.
Жаңа нысандардың ашылуына ҚР Бас прокурорының орынбасары Ғалымжан Қойгелдиев пен Ақмола облысының әкімі Марат Ахметжанов қатысты.
Айта кетейік, облыста тағы сегіз медициналық нысанның құрылысы аяқталуға жақын. Жалпы, өңірде денсаулық сақтау саласын дамытуға Арнаулы мемлекеттік қордан 1,7 млрд теңгеге жуық қаражат бөлінген.