RUS
SMARTNEWS.KZ басылымының хабарлауынша, психикалық денсаулық орталығының екі қызметкері кәмелетке толмаған пациентті зорлағаны үшін 15 жылға сотталды.
Шымкент қаласының қылмыстық істер жөніндегі мамандандырылған ауданаралық соты Түркістан облыстық психикалық денсаулық орталығының екі санитар-бақылаушысына үкім шығарды. Олар Қылмыстық кодекстің 120-бабы 3-1-бөлігінің 1-тармағы ("Кәмелетке толмаған адамды зорлау") бойынша кінәлі деп танылып, әрқайсысы 15 жыл мерзімге бас бостандығынан айырылды.
Сот мәліметі бойынша, айыпталушылар – 33 жастағы Даржанов және 43 жастағы Дүйсебаев – облыстық орталықтың №3 әйелдер бөлімшесінде жұмыс істеген. Тергеу материалдарында көрсетілгендей, олар 2024 жылдың шілде айында бөлімшеде ем алып жатқан 17 жастағы психикалық ауруға шалдыққан қызды бірнеше рет жыныстық қатынасқа мәжбүрлеген. Оқиғадан кейін жәбірленуші жүкті болып, медициналық көрсеткіштер бойынша аборт жасалған.
Сот процесінде жәбірленушінің ауруханадағы емделу кезеңі мен жүктілік мерзімі сәйкес келетіні анықталды. Қосымша сараптамалар мен дәлелдер негізінде сот айыпты деп таныды.
Жәбірленушілердің бірі – кәмелетке толмаған Қ., екіншісі – 21 жастағы емделуші. Екеуі де психикалық дертке байланысты ем қабылдап жатқан. Сотталушылар кінәларын мойындаған жоқ. Алайда сот жинақталған дәлелдер мен сараптамаларға сүйене отырып, қылмыс құрамы толық дәлелденген деп шешім шығарды.
Сот үкімімен санитар Даржанов пен Дүйсебаев әрқайсысы 15 жылға бас бостандығынан айырылды. Оларға педагогикалық және кәмелетке толмағандармен жұмыс істеу құқығынан өмір бойына айыру жазасы қолданылды. Сондай-ақ жәбірленушілердің пайдасына әрқайсысына 10 млн теңгеден моральдық өтемақы өндірілді. Қосымша 600 мың теңге адвокаттық шығындар өтелетін болды.
Сот үкімі әлі заңды күшіне енген жоқ.