RUS
SMARTNEWS.KZ басылымының хабарлауынша, Түркістан облысы Сіргелі ауылында көрші балаларды әжетхана шұңқырына лақтырып, біреуінің өліміне себеп болған 15 жастағы жасөспірімге қатысты сот шешімі шықты. Сот оны қылмыстық жауапкершіліктен босатып, мамандандырылған психиатриялық ауруханада мәжбүрлі ем қабылдау шарасын белгіледі.
Іс материалдарына сәйкес, 2008 жылы туған қыз бала 2024 жылдың 16 мамырында 3 жасар көршісін қасақана дәретханаға лақтырып, өлтірген. Ал шілде айында тағы бір 5 жасар қызды дәл осылай өлтірмек болған, бірақ сәтсіз аяқталған.
Сот сараптамасы жасөспірімнің “шизофрения белгілерімен жүретін жіті психоз” диагнозына шалдыққанын растады. Оқиға кезінде ол өз әрекетіне жауап бере алмайтын жағдайда болған.
Қылмыстық кодекстің 16-бабына сәйкес, психикалық аурумен қоғамға қауіпті әрекет жасаған адам жазаланбайды. Сондықтан сот интенсивті бақылау жағдайындағы мәжбүрлі ем тағайындау жөнінде шешім шығарды. Қаулы заңды күшіне енді.
Айта кетейік, 2024 жылы мамырда Сіргелі ауылында 3 жасар қыз жоғалып кетіп, үш күннен кейін көрші үйдің дәретханасынан өлі табылған болатын. Көп ұзамай тағы бір бүлдіршін дәл сондай жағдайда құтқарылып, тергеу қайта жанданған.