RUS
SMARTNEWS.KZ басылымының хабарлауынша, әлеуметтік желілерде Өзбекстанның Бұхара қаласындағы мектепте болған жан түршігерлік оқиға түсірілген видео тарады. Онда ересек ер адамның бастауыш сынып оқушыларын көз алдында ұрып жатқан сәті бейнеленген. Бұл жағдай қоғамда үлкен резонанс туғызды.
Оқиға 30 сәуір күні №34 мектептің 4-Б сыныбында болған. Алдын ала ақпарат бойынша, көшеде балалардың арасында жанжал болып, бір оқушы досының әкесіне хабарласқан. Ер адам мектепке келіп, баласына қол көтергендерді іздеп, сыныпқа кіріп барған.
Видеодан көргендей, ол балаларды бір-бірлеп шақырып, жұдырық ала жөнеледі. Ең сорақысы — мұның бәрі сынып жетекшісінің көз алдында болғанымен, мұғалім ешқандай әрекет етпеген.
Мектеп әкімшілігі полиция шақырған. Ер адамға 1,8 миллион сум (шамамен 65 мың теңге) көлемінде айыппұл салынған. Бірақ бұл жаза әлеуметтік желі қолданушылары мен ата-аналардың ашуын туғызды — олар мұндай озбырлық үшін тым жеңіл жаза деп санайды.
Оқиғадан кейін мектеп күзетшісі жұмыстан қуылды. Сонымен қатар, білім ордасының директоры да қызметінен босатылды. Қазір сынып жетекшісі мен мектеп басшылығының басқа да мүшелеріне қатысты қызметтік тергеу жүргізіліп жатыр.
"Әрбір бала мектепте өзін қауіпсіз сезінуі тиіс. Бұл үшін тек әкімшілік емес, әр педагог жауапты", — деп мәлімдеді Бұхара облыстық білім басқармасы.
Тексеру нәтижесіне қарай қосымша шаралар қабылдануы мүмкін. Оған қатысты ақпарат кейінірек жарияланады.