RUS
SMARTNEWS.KZ басылымының хабарлауынша, 13 маусым – қазақстандық мәнерлеп сырғанаушы Денис Теннің туған күні. Бүгін спортшы тірі болғанда 32 жасқа толар еді.
Денис Тен 1993 жылы Алматы қаласында дүниеге келген. Ол 2009 жылы әлем чемпионатына алғаш қатысып, үздік ондыққа енді. Осы нәтижесімен Қазақстанға Ванкувер Олимпиадасына екі жолдама алып берген.
2010 жылғы Олимпиадада ең жас қатысушы ретінде 11-орын алды. Сол жылы жаттықтырушысын ауыстырып, АҚШ-тағы бапкер Фрэнк Кэроллдың қол астында жаттыға бастайды.
2011 жылы Азиадада алтын медаль иеленді. 2013 жылы Канадада өткен әлем чемпионатында 266,48 балл жинап, күміс жүлдегер атанды.
Қазақстандық спортшы 2018 жылы 19 шілдеде Алматыда қаза тапты. Оған автокөлігінің айнасын ұрламақ болған екі адамның шабуылы кезінде пышақ жарақаты салынған. Денис ауруханада көз жұмды.