RUS
SMARTNEWS.KZ басылымының хабарлауынша, Израильдің Иран астанасына жасаған соққысы жаһандық нарыққа ықпал етті. Геосаяси шиеленіс мұнай бағасының күрт өсуіне себеп болса, Еуропа мен Азия биржаларындағы акциялар құлдырады.
Brent маркалы мұнай бағасы 8,28%-ға өсіп, 75,10 долларды құрады. АҚШ-тағы WTI эталондық мұнайы 8,8%-ға қымбаттап, баррелі 74 долларға жақындады.
Азия нарықтарында токиолық Nikkei 225 – 1,2%-ға, сеулдік Kospi – 1,4%-ға, гонконгтық Hang Seng – 0,9%-ға, қытайлық Shanghai Composite – 0,8%-ға, ал австралиялық S&P/ASX 200 – 0,3%-ға төмендеді.
The Economist Intelligence талдаушысы Сюй Тиаченнің айтуынша, «Израильдің шабуылы әлемдік он ірі қауіптің қатарына кіреді. Алайда Азия нарығы тез қалпына келеді деп күтілуде, себебі Сауд Арабиясы мен БАӘ тәрізді елдермен байланыс тұрақты».
АҚШ-тағы фьючерстік индекс мәндері де төмендеді: S&P 500 – 1,5%, Nasdaq 100 – 1,7%, Dow Jones – 1,4%-ға азайды.
Дегенмен бейсенбіде Уолл-стритте инфляцияның төмендеуі туралы жағымды мәліметтер аясында акциялар өсім көрсетті. S&P 500 – 0,4%-ға, Dow Jones – 0,2%-ға, Nasdaq Composite – 0,2%-ға көтерілді. Oracle компаниясының акциясы табыс пен кірістің жоғары болуына байланысты 13,3%-ға өсті.
Ал Boeing акциясы 4,8%-ға арзандады. Бұл Үндістандағы Air India әуе кемесінің апатынан кейін болды. Boeing 787 Dreamliner ұшағы ұшқаннан кейін көп ұзамай тұрғын үйге құлаған. Бортта 242 адам болған.
Жалпы, облигация нарығындағы табыстылықтың төмендеуі мен инфляцияның баяулауы АҚШ Федералдық резервінің пайыздық мөлшерлемені төмендету мүмкіндігіне үміт ұялатып отыр. Келесі аптада ФРЖ отырысы өтеді, дегенмен сарапшылар мөлшерлеме өзгермейді деп болжап отыр.
Валюта нарығында жұма күні АҚШ доллары жапон иенасына шаққанда 143,67 деңгейіне көтерілсе, еуро долларға қатысты 0,5%-ға арзандап, $1,1528 болды.