RUS
SMARTNEWS.KZ басылымының хабарлауынша, 12 маусымда Үндістанда болған әуе апатында 242 жолаушының ішінде тек бір адам ғана тірі қалды. Ол — Ұлыбританияда тұратын, үндістандық тегі бар 40 жастағы Висваш Рамеш.
Ол бауыры, 35 жастағы Аджайкумар Рамешпен бірге Ахмедабадтан Лондонның Гатвик әуежайына ұшатын рейспен сапарға шыққан. Екеуі де іссапармен Үндістанға келген.
Апат кезінде Висваш ұшақтың 11А орнында, апаттық шығуға жақын отырған. Ал ағасы Аджай — дәл сол қатарда, бірақ екінші жағындағы 11J орнында болған.
Оқиғадан кейін жараланған Висваш адамдардан:
«Аджайды табыңдар, өтінем, Аджайды табыңдар», — деп жалынып сұраған.
Алғашқы сағаттарда отбасы Аджай туралы ақпарат іздеп әлек болды, себебі оның телефоны ұзақ уақыт бойы жауап беріп тұрған. Алайда кейін Air India әуекомпаниясы рейсте болған 242 адамның 241-і қаза тапқанын растады. Бұл Аджайдың тірі қалуына үміттің жоқ екенін білдірді.
— Біз Аджай тірі қалып, ауруханаға жеткізілді деп үміттендік, — дейді туыстарының бірі Наянкумар.
Air India әуекомпаниясының AI171 рейсі 12 маусымда Ахмедабад әуежайынан ұшқан соң көп ұзамай апатқа ұшыраған. Ұшақ Лондонға бет алған.
БАҚ дерегінше, апат орны — тұрғын үй маңы. Құтқарушылар үйінділердің астынан 30-35 адамның денесін алып шықты. Ұшақтың құлауына құстармен соқтығысу себеп болуы мүмкін деген болжам бар.
Апатқа байланысты Қазақстан Президенті Үндістан премьер-министріне көңіл айту жеделхатын жолдады.