RUS
SMARTNEWS.KZ басылымының хабарлауынша, әлеуметтік желіде әнші Ұланғасыр Қамидың репертуарындағы танымал «Қызыл раушан» әнінің авторы үй-күйсіз жүргені туралы видео тарады. Ән мәтінін жазған адамның аты-жөні — Шуақ Рахымберді. Ол ішімдікке салынып, қаңғыбастық күйге түскен.
Шуақтың айтуынша, ол «Белые розы тербеткен би алаңы…» деп басталатын өлеңін сүйіктісі Раушанға арнап жазған. Кейін бұл мәтінді небәрі 1,5 мың долларға сатқанын ашық айтты.
«Ұланғасыр Қами айтатын. Сатып жібердім, 1,5 мың долларға. Жан жарым Раушанға арнап жазғанмын. Өлең шығардым, Мұхтар Ниязовтың шәкірті болдым. Өткен өмірді қазбаламай-ақ қояйық», – деді ол TikTok-та жарияланған видеода.
Видео жарияланғалы бері желі қолданушылары арасында Шуақ Рахымбердіні танитындар да табылып жатыр. Олардың айтуынша, ол бала кезінде өте белсенді, оқуда озат болған. Бірі оны ақын, екіншісі КВН-ге қатысушы ретінде еске алады.
«Қайран парталасым-ай, не болып кеткенсің?», «Шуақ деген кісі ғой, өзі ақын, бір жағынан жылқы сатып алатын еді, неге мұндай халге түскен?», «94 жылғы, кезінде талай айтыста айтысып едік», «Шуақ есімді жігіт қой, ауылдасым, мектепті жақсы оқыған, белсенді еді. КВН-ның бәріне қатысатын», - делінген TikTok пікірлерінен.
Әзірге Шуақтың қазіргі жағдайы бойынша жергілікті органдар тарапынан ешқандай ресми мәлімдеме жасалған жоқ. Алайда көпшілік желіде оны бұл күйден алып шығуға ниетті екенін білдіріп жатыр.