RUS
SMARTNEWS.KZ басылымының хабарлауынша, дүйсенбі күні таңертең Израильге жасалған ирандық зымыран шабуылының салдарынан кемінде үш адам қаза тауып, жүзден аса адам жарақат алды. 70-тен астам зардап шеккен адам ауруханаға жеткізілген.
Иран тарапының мәліметінше, ұрыс басталғалы бері 224 адам көз жұмып, 1300-ге жуық адам жарақат алған. Израиль қарулы күштері Иранның ядролық және әскери нысандарына жаппай соққы жасап жатыр. Шабуылдар Иран Ислам Республикасының жоғары әскери басшылығын да нысанаға алған.
Құрбандар қатарында — Ислам революциясы сақшылар корпусы (КСИР) барлау қызметінің басшысы мен оның орынбасары бар.
Дүйсенбі күні Израиль Қорғаныс армиясы (ЦАХАЛ) Тегеранда орналасқан «Аль-Кудс» арнайы күштерінің командалық орталықтарына әуе соққысы жасалғанын мәлімдеді. Бұл — КСИР-дің шетелдегі операцияларға жауапты құрылымы. Әскерилердің айтуынша, бұл орталықтар шетелдік лаңкестік ұйымдарды, соның ішінде Ливандағы "Хезболланы" қаржыландыру, басқару және Израильге қарсы шабуылдар жоспарлау үшін қолданылған.
Израильдің дерегінше, Иран жұма күнінен бері 270-тен астам зымыран атқан. Соның 22-сі «Темір күмбез» әуеқорғаныс жүйесінен өтіп кеткен. Шабуылдардың салдарынан 14 адам қаза тауып, жүздеген адам жарақат алған.
Израиль билігі бұл шабуылды "Иран тарихындағы ең ірі жауап соққы" деп атады және оның басты мақсаты — Тегеранның ядролық қару жасауын болдырмау екенін атап өтті.
Тегеран мен Вашингтон арасында жексенбі күні Оманда өтеді деп жоспарланған Иранның ядролық бағдарламасына қатысты келіссөздер Израиль шабуылдарынан кейін кейінге қалдырылды.
Иран Катар мен Оман арқылы — АҚШ және Израильмен байланыс орнататын делдал мемлекеттерге — «Израиль соққылары жалғасып жатқанда, атысты тоқтату туралы ешқандай келіссөз болмайды» деп мәлімдеген.
Еуроодақтың сыртқы саясат жөніндегі өкілі Кая Каллас сейсенбіде мүше мемлекеттердің сыртқы істер министрлерімен шұғыл онлайн кездесуді өткізетінін хабарлады.
"Бұл кездесу жағдайды бағалауға, Тель-Авив пен Тегеранмен дипломатиялық жұмысты үйлестіруге және алдағы әрекеттерді айқындауға мүмкіндік береді", — деді Каллас кеңсесі.
"Біз шиеленісті азайтуға және Иранның ядролық мәселесі бойынша ұзақ мерзімді шешім табуға бағытталған барлық дипломатиялық күш-жігерге үлес қосуды жалғастырамыз. Мұндай шешім тек келіссөздер арқылы жүзеге асуы мүмкін", — делінген ЕО мәлімдемесінде.