RUS
SMARTNEWS.KZ басылымының хабарлауынша, АҚШ президенті Дональд Трамп Израиль мен Иран арасындағы қақтығысты тоқтатуға уәде берді. Ол Truth Social желісіндегі парақшасында тараптарды бітімге келуге шақырды.
«Иран мен Израиль мәмілеге келуі тиіс, әрі олар мәмілеге келеді де. Дәл сол секілді мен Үндістан мен Пәкістан арасындағы келісімге қол жеткіздірген едім», – деп жазды Трамп Truth Social-да.
Ол өзінің алғашқы президенттік мерзімінде Сербия мен Косово арасындағы, сондай-ақ Египет пен Эфиопия арасындағы шиеленісті тоқтатуға ықпал еткенін еске салды.
«Дәл солай, жақын арада Израиль мен Иран арасында да бейбітшілік орнайды! Қазір көптеген қоңырау мен кездесулер өтіп жатыр», – деді ол.
Трамп Хаменейге қастандық жасау ұсынысын қабылдамаған
NBC News дерегі бойынша, Дональд Трампқа Иранның жоғарғы көшбасшысы аятолла Әли Хаменейге қастандық жасау ұсынылған. Алайда ол бұл ұсыныстан бас тартқан.
Бұл ретте, АҚШ Сенатының өкілдері де қақтығыстан бойын аулақ ұстауға шақырды. Калифорниялық демократ сенатор Адам Шифф пен Кентуккиден сайланған республикашыл сенатор Рэнд Пол NBC арнасындағы Meet the Press бағдарламасында сөйлеп, Вашингтонды Иранмен әскери қақтығысқа тартылмауға шақырды.
Иран мен Израиль келіссөзге орала ма?
NBC News-ке сұхбат берген Иран үкіметіндегі дереккөздің айтуынша, Израиль Батыс елдері арқылы Тегеранмен байланыс орнатып, шабуылдарын тоқтатып, ядролық келіссөздерге қайта оралуды сұраған.
Дегенмен, Израиль премьер-министрі Биньямин Нетаньяху Иран сыртқы істер министрі Аббас Арагчидің ұсынысына күмәнмен қараған. Арагчи бұған дейін Иран Израиль шабуылдарын тоқтатса, Тель-Авивке қарсы соққыларды доғаруға дайын екенін мәлімдеген еді.