RUS
SMARTNEWS.KZ басылымының хабарлауынша, Қазақстанның Сыртқы істер министрлігі Иран мен Израиль арасындағы шиеленістің ушығуына байланысты Таяу Шығыстағы жағдайды мұқият бақылап отыр. Бұл туралы СІМ ресми өкілі Айбек Смадияров мәлімдеді.
Қазіргі мәлімет бойынша, Иранда — 132, ал Израильде — 219 Қазақстан азаматы бар. Екі елдегі Қазақстанның дипломатиялық өкілдіктері күшейтілген режимде жұмыс істеуде. Дипломаттар азаматтармен тұрақты байланыста.
«Қазіргі жағдайда Иран мен Израильдегі отандастарымызға аса қажет болмаса, орын ауыспауға, қауіпсіздік шараларын қатаң сақтауға, ресми дереккөздерден жаңалықтарды бақылап отыруға және жергілікті биліктің нұсқауларын орындауға кеңес береміз», — деді Айбек Смадияров.
СІМ көмегімен Ираннан 74 қазақстандық шықты
Соңғы күндері Сыртқы істер министрлігі 74 қазақстандықтың Ираннан шығуына жәрдемдескен. Атап айтқанда, 14 маусымда іссапармен барған алты адам Азербайжан арқылы эвакуацияланды. 15 маусымда тағы 68 азамат — оның ішінде дипломаттардың отбасы мүшелері, ОЭС хатшылығының өкілдері мен іссапардағы қызметкерлер — Түрікменстанға шығарылған. Олардың Қазақстанға оралуы алдағы күндері күтілуде.
Сонымен қатар, Ирандағы ҚР дипломатиялық өкілдігі штаттық режимде жұмысын жалғастырып жатыр.
Авиарейстерге қатысты қиындықтар
Араб Әмірліктерінде рейстердің жаппай тоқтатылуына байланысты 300-ге жуық қазақстандықтың елге ұшуы уақытша кідірген. Қазір бұл мәселені шешу үшін оқиға орнында дипломаттар жұмыс істеп жатыр. Алдын ала мәлімет бойынша, олардың жартысынан көбі келісімдер нәтижесінде елге оралады.
Ұшуға тыйым салынған бағыттар
ҚР Туризм және спорт министрлігі 14 маусымда қазақстандықтарға Иран, Израиль, Сирия, Ирак, Иордания және Ливан аумағындағы әуе кеңістігінен ұшудан немесе бұл елдерге барудан бас тартуға кеңес берді. Туристерге сапарды жоспарлағанда, әсіресе БАӘ мен Парсы шығанағы елдеріне барарда, тәуекелдерді ескеру қажет.
Үйлестірілген жұмыс жалғасуда
СІМ, Туризм және спорт министрлігі, «Қамқор» туристік қоры мен әуе компаниялары бірлесіп қазақстандық азаматтарға көмек көрсету жұмыстарын жалғастырып жатыр.