RUS
SMARTNEWS.KZ басылымының хабарлауынша, ауыр атлетикадан әлем чемпионатының күміс жүлдегері Алмас Өтешов лауазымды қызметке тағайындалды.
Ол Қызылорда облысының дене шынықтыру, спорт және туризм басқармасының басшысы Бақтияр Артаевтың шешімімен, Олимпиадалық резерв даярлау орталығы директорының орынбасары қызметіне кірісті. Бұл туралы басқарманың баспасөз қызметі хабарлады.
Өтешов бұған дейін, соңғы бес ай бойы, "Мұз айдыны" мекемесінде әдіскер қызметін атқарған.
Айта кетейік, Алмас Өтешов – Қазақстанның еңбек сіңірген спорт шебері, ауыр атлетикадан Азия чемпионы, Азия ойындарының және әлем чемпионаттарының бірнеше дүркін жүлдегері.
Бұған дейін, Әлем чемпионатының күміс жүлдегері Нұрсейіт Жылқышыбайға берген сұхбатында Алмас Өтешов допинг қабылдағанын мойындаған еді.
Допинг деген дәрі жоқ. Аспирин ішсең де ол допинг болып саналады. Бірақ оның ішінде тестостерон бәрін салады. Допингті тексеретіндермен біздің министрлік келіседі. Ақша бәрі. Бізді тексеруге келгенде «двойник» деген болады бізде. Менің «двойнигім» Айдос деген мысалы інім болды. Алмас Өтешов болып ол тест тапсырады. Илья Ильиннің ағасы бар – Алексей тапсырады. Олар таза болып шығады. Бәрі жемқорлық, – деді Өтешов.
Ауыр атлеттің сөзінше, препарат көп – тестостерон, пропианат, тернобол, таблеткалар, гармональды таблеткалар. Ол зілтемірді онсыз көтеру мүмкін еместігін айтады.
Илья Ильиннің де допинг қабылдағаны өтірік емес. Бәріміз допинг қабылдадық. Дәріні өзіміз болып ішпейміз. Медициналық жауапты маман, аға бапкер, бас бапкер бар. Солар бізге береді. Бәріне кінәлі Алексей Ни. Соны соттау керек. Қазір қайда ол? Жоқ. Бәрін істеген сол, – дейді Өтешов.
Еске салсақ, 2016 жылы спортшы допинг дауына ілігіп, жарыстардан шеттетілген болатын. Допинг дауынан кейін дисквалификациядан кейін біраз уақыт жұмыс таба алмай, қиын кезеңдерді өткергенін айтқан еді.