RUS
SMARTNEWS.KZ басылымының хабарлауынша, әлеуметтік желіде Самарқанд облысы Ургут ауданының шенеунігі фермерлерді қорқытып, «егін екпегендердің жері шетелдіктерге беріледі» деген мәлімдемесі тарады. Өзбекстан Ауыл шаруашылығы министрлігі бұл жағдайға ресми түсініктеме беріп, шенеуніктің сөзі заңға қайшы екенін мәлімдеді.
Министрліктің мәліметінше, «Фермерлік шаруашылық туралы» заңға сәйкес, фермерлер жерді жалға алып, өз бетінше жұмыс істеуге құқылы және оларға мемлекеттік органдар тарапынан заңсыз араласуға жол берілмейді.
Сондай-ақ, жер жалдау келісімшартын мерзімінен бұрын бұзу тек тараптардың өзара келісімімен немесе сот шешімімен ғана жүзеге асады, – деп атап өтті ведомство.
Бұған қоса, барлық жер – мемлекеттік меншік және шетел азаматтарына немесе компанияларына меншікке беру заңмен тыйым салынған.
«Жер шетелдіктерге беріледі» деген мәлімдеме шындыққа жанаспайды, заңдық күші жоқ және министрліктің ресми ұстанымын білдірмейді», – делінген министрлік хабарламасында.
Қазіргі уақытта шенеуніктің айтқанына құқықтық баға беріліп жатыр. Ауыл шаруашылығы министрлігі фермерлерге өз құқықтарын білуге және заңсыз қысым болған жағдайда прокуратураға немесе министрлікке жүгінуге кеңес берді.