RUS
SMARTNEWS.KZ басылымының хабарлауынша, 2025 жылғы 17 маусымға қараған түні Ресей Федерациясының әуе күштері Киев қаласына жаппай шабуыл жасап, кемінде 14 адамның өмірін қиды. Тағы 44 тұрғын түрлі жарақат алған. Бұл туралы Украина Ішкі істер министрі Игорь Клименко мәлімдеді.
Киев мэрі Виталий Кличконың айтуынша, әсіресе Соломенский ауданы қатты зардап шеккен – мұнда көпқабатты тұрғын үйдің бір подъезі толығымен қираған. Қала әкімшілігі шабуыл кезінде негізінен тұрғын үйлер мен әлеуметтік нысандар нысанаға алынғанын хабарлады.
Зардап шеккендер арасында Киев авиациялық институтының жатақханасында болған адамдар да бар. Билік өкілдері қираған ғимараттардың астында адамдар болуы мүмкін екенін айтып, құтқару жұмыстарының жалғасып жатқанын жеткізді.
Сол түні Одесса қаласына да дрондармен шабуыл жасалған. Мұнда кемінде 13 адам жарақат алған.
Қаза тапқандардың нақты саны құтқару жұмыстарының аяқталуына қарай өзгеруі мүмкін.