RUS
Жүзуден Олимпиада чемпионы Дмитрий Баландин №376 сайлау учаскесінде дауыс берді.
ҚР еңбек сіңірген әртісі Бақтияр Тайлақбаев бүгінгі күннің маңыздылығына тоқталды.
«Сайлауға бару – әр адамның борышы. Осы арада «неге?» деген заңды сұрақ туатыны анық. Қазір көптеген мүмкіндік ашылды. Елімізге жақсылық алып келетін өзгерістер орнап жатыр. Көптеген ілкімді іс қолға алынды. Жаңа һәм тың бастамалар көтеріліп жатыр. Қазіргі сайлау демократияға жақын деп есептеймін», – деді әнші.
Жазушы, драматург Дулат Исабеков сайлау учаскесіне ұлттық киіммен келді.
«Мен азаматтық борышымды орындап, жаңа Қазақстанның жаңа адамдары үшін дауыс бердім. Осы мүмкіндікті пайдаланып, барша отандастарымды Наурыз мерекесімен құттықтағым келеді»,- деді Дулат Исабеков
Қазақстан жазушылар Одағының төрағасы, Қазақстанның еңбек сіңірген қайраткері, ақын Ұлықбек Есдәулет бүгінгі сайлау науқанында дауыс беруінің мақсаты – Мәжіліске және жергілікті мәслихаттарға халыққа жаны ашитын білімді тұлғаларды таңдау екенін атап өтті.
«Елімізді жаңарту, Әділетті Қазақстан құру, әділ қоғам құру – оңай шаруа емес. Оның бір басы әрине, заңдарға келіп тіреледі. Сондықтан Парламентте отыратұғын ертеңгі заң қабылдаушы тұлғалар жан-жақты білімді, зиялы және еліне-жеріне, халқына жаны ашитынтұғын адам болуы керек. Біз бүгінгі сайлауда Парламентке дәл сондай тұлғаларды, ел мұң-мұқтажын көре білетін, айта білетін және заң жүзінде іске асыра алатын адамдарды таңдау үшін өз даусымызды бердік. Сайлау учаскесіне келгендегі ойым осындай болды», – деді Ұ.Есдәулет.
Ал, актер Әсет Иманғали елдің ертеңі өз қолымызда деп есептейді.
«Бүгін бізде мемлекетімізде айтулы күн. Елдің ертеңі өз қолымызда. Елдің елдігі, береке-бірлігінде. Мен сайлауға барып өз таңдауымды жасадым. Сіз де қапы қалмаңыз. Бұл еліміздің ертеңі, ұрпағымыздың болашағы үшін үлкен шешуші сәт», - деді актер.
№542 сайлау учаскесінде өз таңдауын жасаған «Дарын» мемлекеттік Жастар одағы сыйлығының лауреаты, актер Байғали Есенәлиев бүгінгі сайлаудың ел болашағы үшін маңызды науқан екенін тілге тиек етті.
«Сайлаудың жауапкершілігі үлкен. Осыған дейін де бұндай науқандарға қатыстық. Бастысы қоғам жаңарса екен деген ниетіміз бар. Бұл жолы көптеген игі өзгеріс болатын сияқты. Әсіресе, халық ішінен шыққан тұлғаларды байқаймыз. Қарапайым жұрттың арасынан депутат шыққаны жөн. Сайлаушылардың басым бөлігінің даусын жинап, халық сайлаған депутат атанса, одан асқан бақ болмас. Елдің ішінде жүргендер халықтың мұң-мұқтажын біледі. Нағыз ел-жұртының жағдайын жасай алатын, сайлауалды бағдарламасына сәйкес іс қылатын азамат сайланса деген ізгі тілегіміз бар»,- деді ол.
М.Әуезов атындағы әдебиет және өнер институтының директоры Кенжехан Матыжанов №387 сайлау учаскесінде дауыс берді.
«Бүгін Қазақстанның әрбір азаматы үшін аса жауапты күндердің бірі. Өйткені еліміздің болашағы, мемлекетіміздің дамуы жөніндегі үлкен іске қадам жасалып жатыр. Осы өткен бір жылдың ішінде қаншама саяси науқандар өтті. Сонда халқымыздың әрқашан сергектік көрсетіп келе жатқанын көруге болады», – деді Кенжехан Матыжанов.
Сондай-ақ медицина ғылымдарының докторы, нутрициолог, ғалым Төрегелді Шарманов өзінің сайлау учаскесіне келіп, ел алдындағы азаматтық борышын орындап, Мәжіліс пен мәслихат депутаттарына дауыс берді.
