RUS
SMARTNEWS.KZ басылымының хабарлауынша, Алматыда ақын Мұқағали Мақатаевты қорлаған блогер Әлішер Теменовке қатысты қылмыстық іс тоқтатылды. Сот шешімі ақынның ұлы Жұлдыз Мақатаевтың кешірім беруіне байланысты шықты.
Наурызбай аудандық сотында ҚР ҚК 131-бабының 2-бөлігі (қорлау) бойынша қаралған істе жәбірленуші бастапқыда 10 миллион теңге моральдық өтемақы талап еткен. Бірақ 16 маусымдағы сот отырысында ол айыпталушыны кешіріп, істі жабуды сұрады.
“Қазір көлігімде 2 миллион теңге бар. Тағы 1 миллион теңгені он күн ішінде беремін. Әзірге көліктің кілтін қалдырамын, ақшаны толық төлеген соң көлігімді қайтарып аламын”, - деді айыпталушы өз кінәсін толық мойындап.
Судья Бейнегүл Кайсина екі тараптың келісімін ескеріп, қылмыстық істі тоқтатты, Теменов қылмыстық жауапкершіліктен босатылды. Сондай-ақ азаматтық талап та жойылды.
Дегенмен, сот шешімі заңды күшіне енгенге дейін Теменовтің елден кетпеуі және тиісті мінез-құлық ұстануы міндетті.
Еске салайық, 2024 жылдың 8 қазанында Әлішер Теменов әлеуметтік желіде Мұқағали Мақатаевқа тіл тигізіп, оны «сорлы еркек» деп атап, бейәдеп видео жариялаған. Бұл қоғамда үлкен резонанс тудырған. Блогер жалпы жұртшылықтан да кешірім сұрап, бейнежазбаны өшіруге уәде берді.