RUS
SMARTNEWS.KZ басылымының хабарлауынша, Еуроодақтың сыртқы саясат жөніндегі өкілі Кая Каллас АҚШ-ты Иран мен Израиль арасындағы шиеленіске әскери араласудан сақ болуға шақырды. Оның айтуынша, мұндай қадам бүкіл Таяу Шығыс өңірін қамтитын ауқымды соғысқа әкелуі мүмкін.
«Егер араласу орын алса, бұл тек Израиль мен Иран емес, бүкіл өңірді қамтитын кең ауқымды қақтығысқа айналады. Бұл ешкімнің мүддесіне сай келмейді», – деді Каллас 27 ЕО елінің сыртқы істер министрлерімен онлайн кездесуінен кейін.
Калластің бұл мәлімдемесі АҚШ президенті Дональд Трамптың «АҚШ араласуы мүмкін» деген сөзіне жауап ретінде айтылды. Трамп жексенбіде:
«Мүмкін біз араласатын шығармыз. Қазір бұл іске қатыспаймыз, бірақ егер Иран америкалық күштерге тиіссе — соққы береміз», – деген болатын ABC News-ке берген сұхбатында.
Айта кетейік, АҚШ Иранмен қарулы қақтығысқа қатысу мүмкіндігін қарастырып жатыр. Израиль мен Иран арасындағы ашық соғыс жалғасып жатқан тұста, Axios басылымы Израильдің Вашингтонды жанжалға тікелей араластыруға тырысып жатқанын хабарлады. Осы жағдай аясында АҚШ билігі Таяу Шығысқа USS Nimitz атты авианосецін жөнелтті.
АҚШ президенті Дональд Трамп жағдайдың күрделенуіне байланысты Канадада өтіп жатқан G7 саммитінен ерте кетіп, Вашингтонға оралды. Президент бұған дейін ABC News-ке берген сұхбатында, егер Иран америкалық күштерге шабуыл жасаса, АҚШ «жауап беретінін» ашық мәлімдеген болатын.
Ал Еуропалық одақ Иранның ядролық қару жасауына қарсы болғанымен, оның бейбіт ядролық бағдарламасына тыйым салуға қарсы емес. Алайда Трамп әкімшілігі Ираннан ядролық бағдарламаны «толық және нақты» тоқтатуды талап етуде.
Жағдай одан әрі ушығатын болса, Таяу Шығыс көлеміндегі кең ауқымды соғыс қаупі туындайтыны жөнінде сарапшылар мен дипломаттар ескертіп отыр.