RUS
SMARTNEWS.KZ басылымының хабарлауынша, «Қалаулым» бағдарламасы арқылы танылған блогер Зарина Сапар бұрынғы күйеуі Айдос Игіліков тарапынан көрген қорлығын жайып салды. Ол ауыр оқиғаларын «Айтарым бар» подкастында бөлісті.
Заринаның айтуынша, экс-жолдасы – журналист әрі медиа маманы Айдос Игіліков оны эфирде отырған жерінен алып қашқан. Бұған бағдарлама редакциясы да, қатысушылар да сенбеген.
«Айдос мені сырттай ұнатады екен, бірақ біз мүлде жұп болып жүрген емеспіз. Тіпті флирт те болмады. Алып қашты. Ұят болады деп, басында сеніп қалдым. Бірақ неге екенін білмеймін, жолда да, барған кезде де ұйықтап жаттым. Ішімнен бір күдік бар: мүмкін, бір нәрсе ішкізген болар. Барған жерім де адал келдің бе деп тексерді», – дейді блогер.
Оның сөзінше, некеден кейін екі апта өтпей жатып, Айдос оған алғаш рет қол көтерген.
«Ең алғаш өз ақшамды анама жібергенім үшін боқтап, ұрды. Ол – тұрмысқа шықпай тұрып тапқан ақшам. Есімнен танғанша ұрып, қылқындырған кезі болды. Денеме із түспейтін, адам көрмейтін жерден ұратын. Телефонды сындырып тастайды, үйіме хабарласа алмауым үшін. Бұл – жай ашумен болған нәрсе емес, нақты жоспарланған зорлық. Одан аяғым ауыр кезде, ішіме отырып алып басымды екі жаққа соқты. Өзі біледі, еркек болса, мойындасын», – деді Зарина.
Көпшілікке танымал қос тұлғаның арасындағы жанжал әлеуметтік желіде қызу талқылануда. Айдос Игіліков әзірге бұл мәлімдемелерге жауап бермеді.