RUS
SMARTNEWS.KZ басылымының хабарлауынша, Қаржы министрі Мәди Такиев елімізде табысын жасырған жүздеген блогерге қатысты тексеру басталатынын жеткізді. Бұл туралы ол Мәжілістің жалпы отырысынан кейінгі брифингте айтты.
Министрдің айтуынша, бүгінге дейін 854 блогерге 72 млрд теңге көлемінде табыс салығын төлеу туралы хабарлама жіберілген. Оның ішінде 394 блогер 11,8 млрд теңге салық төлеген.
«Блогерлер 2026 жылғы 31 наурызға дейін декларация тапсыруы тиіс, яғни табысын растайды. Жалпы, блогерлермен үлкен жұмыс жүргізілді. Мыңдаған блогерге салық төлемі туралы хабарлама жіберілді», — деді Мәди Такиев.
Ал қалған 438 блогердің салықтық міндеттемесі тексеріледі.
Министр бұған дейін 360-қа жуық блогердің өз еркімен 10,5 млрд теңге табысын растағанын, бұл бойынша 256 млн теңге көлемінде салық төленгенін атап өтті.
Жалпы, мемлекеттің блогерлер табысына назар аудара бастауы медиа нарығындағы көлеңкелі қаржы ағынын азайтуға бағытталған қадам ретінде қарастырылып отыр.