RUS
SMARTNEWS.KZ басылымының хабарлауынша, «Мисс Қазақстан» сұлулық байқауы енді дене бітімі ерекшелеу арулар мен трансгендер адамдар үшін де ашық.
Бұл туралы 18 маусымда өткен баспасөз мәслихатында байқауды ұйымдастырып отырған Miss Qazaqstan қоғамдық қорының директоры Айжан Рузаева мәлімдеді.
«Plus-size арулар қатыса алмайды дегенді кім айтты? Біз мұндай қатысушыларды қуана қарсы аламыз. Біз бәрін күтеміз. Мейлі ол трансгендер болсын, мейлі plus-size болсын — бұл еркін таңдау. Егер адам өзін солай сезінсе, қатыса алады. Біз бәріне ашықпыз. Егер plus-size қыз келіп, әдемі, харизмасы мықты, жарқын болса — біз оны да қарастырамыз. 90-60-90 өлшемдері баяғыда-ақ ұмыт болған», — деді Рузаева.
Айта кетейік, биылғы байқаудың финалы ерекше форматта — Алматы метросының «Мұхтар Әуезов театры» станциясында өтпек. Кеш 30 қараша күні сағат 23:00-де басталады. Мұндай түнгі уақыт жолаушылар қозғалысына кедергі келтірмеу үшін таңдалған.
Финал жабық форматта өтеді, билет сатылмайды. Байқауды тек арнайы шақырту алған 90 адам — журналистер, блогерлер мен демеушілер ғана тамашалай алады. Ал көпшілікке онлайн трансляция арқылы қолжетімді болады.
«Мисс Қазақстан» — елдегі ең танымал әрі беделді сұлулық байқауларының бірі. Соңғы жылдары бұл конкурсқа қатысу шарттары либералды бола бастады. Ұйымдастырушылар қазіргі заман талаптарына сай болу үшін инклюзивтілікке бет бұрып отыр.
Бұл шешім ел ішінде түрлі пікір тудырып жатса да, ұйымдастырушылар байқауды барша әйел баласына ашық алаң ретінде ұсынуды көздеп отыр.