RUS
SMARTNEWS.KZ басылымының хабарлауынша, 2025 жылғы 19 маусымда Иран Израильге шамамен 30 баллистикалық зымыранмен соққы жасады. Израиль Қарулы күштерінің (ЦАХАЛ) дерегінше, ракеталардың бірі оңтүстіктегі Беэр-Шева қаласында орналасқан "Сорока" ауруханасына түскен. Бұдан бөлек, орталықтағы Холон және Рамат-Ган қалалары да шабуыл астында қалған. Алдын ала мәлімет бойынша, 70-тен астам адам жарақат алған.
Зардап шеккендердің көбі — жеңіл жараланғандар, олар көбіне соққы толқынынан зардап шеккен. Аурухана директоры Шломи Кодештің айтуынша, ракета хирургия бөлімінің ескі ғимаратына түскен. Бұл корпус жақында ғана эвакуацияланған болатын.
«Басқа да ғимараттар қатты зақымданды. Бірақ науқастар мен қызметкерлер шабуыл кезінде қауіпсіз орында болды», — деді профессор Кодеш The Times of Israel басылымына.
Израиль басшылығы Иранды әскери қылмыс жасады деп айыптады
Оппозиция жетекшісі Бенни Ганц бұл шабуылды "соғыс қылмысының ең ауыр түрі" деп бағалап, Иранның жоғарғы көсемі Әли Хаменеи жауапқа тартылуы тиіс екенін айтты.
«Иран тек Израильге емес, бүкіл әлемге қауіп төндіріп тұрған ядролық және зымыран бағдарламаларына қарсы біз бағытталған болсақ, олар біздің ауруханаларымыз бен балаларымызды көздеп отыр», — деді Ганц.
Қорғаныс министрі Исраэль Кац Иранды "қорқақ диктатор" деп атап, премьер-министр Нетаньяхумен бірге ЦАХАЛ-ға Тегерандағы стратегиялық және үкіметтік нысандарға соққыны күшейту туралы тапсырма бергенін мәлімдеді.
Израиль Ирандағы ядролық нысандарды атқылады
ЦАХАЛ бұған жауап ретінде Ирандағы бірнеше әскери және ядролық нысандарға, оның ішінде Арак пен Натанз қалаларындағы объектілерге соққы жасағанын хабарлады. Әскерилер тұрғындарды алдын ала ескертіп, эвакуацияға шақырған.