RUS
SMARTNEWS.KZ басылымының хабарлауынша, Ливандағы «Хезболла» қозғалысы мен Ирактың шейіттер жетекшісі, ұлы аятолла Әли Систани Иранның рухани көшбасшысы аятолла Әли Хаменейге қастандық жасалуы мүмкін деген қауіпке байланысты қатаң мәлімдеме жасады. Олар мұндай әрекеттің аймақ үшін ауыр салдарға алып келетінін ескертті.
«Хезболла» қозғалысының мәлімдемесінде Хаменейге қауіп төндіру — ислам әлемі үшін қорлау деп бағаланып, мұндай қадам "жүздеген миллион мұсылманның ар-намысына тию" деп сипатталды.
"Біз бәріміз бір адамдай оған қорған боламыз", – делінген Ливан шейіт ұйымының мәлімдемесінде.
Дегенмен, қозғалыс әзірге Израильге ашық соғыс жариялаған жоқ. Израиль тарапының алғашқы шабуыл толқынынан кейін «Хезболла» Ливан билігін өздерінің қақтығысқа араласпайтыны жайлы хабардар еткен.
Әли Систани: "Кез келген әрекет өңірлік апатқа апарады"
Ирактың ең ықпалды діни тұлғасы аятолла Әли Систани де жағдайға алаңдаушылық білдіріп, Иранға қарсы кез келген агрессияның "өңірлік апатқа" соқтыруы мүмкін екенін мәлімдеді.
"Бұл Иран халқының қайғысын еселей түсіп, барлық тараптардың мүддесіне қайшы келеді", – деді ол.
Иран АҚШ-ты араласпауға шақырды
Жағдайдың күрделенуіне орай Иран Сыртқы істер министрінің орынбасары Казем Гарибабади АҚШ-қа арнайы ескерту жасады. Оның айтуынша, Вашингтон Израиль жағына шықса, Тегеран қарсы шара қолдануға мәжбүр болады.
"Біз АҚШ-қа: Израильдің агрессиясын тоқтата алмасаңыздар, тым болмаса жанжалға араласпаңыздар, – дейміз", – деді дипломат Иран БАҚ-тарына берген сұхбатында.