RUS
SMARTNEWS.KZ басылымының хабарлауынша, Латвия парламенті елдің ұлттық қауіпсіздігін сақтау мақсатында Ресей мен Беларусь азаматтарына ел аумағынан жылжымайтын мүлік сатып алуға тыйым салатын заң қабылдады.
Сейм бекіткен "Ұлттық қауіпсіздікке қатер төндіретін мәмілелерге шектеу қою туралы" заң физикалық және заңды тұлғаларға бірдей қатысты. Тыйым заң күшіне енгеннен кейін жасалған мәмілелерге қолданылады. Яғни, қазіргі уақытта Ресей және Беларусь азаматтарының атына тіркелген жылжымайтын мүлікке шектеу қойылмайды.
Кейбір жағдайларда шектеу қолданылмайды
Жаңа ережеге сәйкес, егер сатып алушы Латвияда тұрақты тұруға рұқсаты бар Ресей немесе Беларусь азаматы болса, онда ол жалғыз тұрғын үйді сатып ала алады. Сонымен қатар, мұрагерлік жолмен немесе сот шешімімен алынған мүлікке де шектеу жүрмейді.
Бірақ үшінші оқылымға дейін ұсынылған, Латвиядан босқын мәртебесін алған Беларусь азаматтарына жылжымайтын мүлік сатып алуға рұқсат беру туралы түзету қабылданған жоқ.
Айта кетейік, Финляндияда да осындай шектеу бар: тек тұрақты тұруға рұқсаты бар Ресей азаматтары ғана жылжымайтын мүлік сатып ала алады.