RUS
SMARTNEWS.KZ басылымының хабарлауынша, Украина Жоғарғы Радасы елде қос азаматтыққа рұқсат беретін заң жобасын мақұлдады.
Енді бұл құжатты президент Владимир Зеленскийдің өзі қол қоюы тиіс. Айта кетейік, бұл бастама — оның 2024 жылы ұсынған бастамасы.
Жаңа заң шетелге кеткен украин азаматтарына өз елінің азаматтығын сақтай отырып, басқа елдің азаматтығын алу мүмкіндігін береді. Министрлер бұл қадамды шетелдегі украиндарды елге қайтаруға бағытталған «маңызды белгі» деп отыр.
«Кейбір азаматтар басқа елдің азаматтығын алуға мәжбүр болды. Біз олардың украиндық болмысын сақтауға мүмкіндік бергіміз келеді», — деді Ұлттық бірлік министрі Алексей Чернышов.
Қазіргі таңда 32 млн адам Украинада өмір сүрсе, 25 миллионы шетелде тұрады. Енді Үкімет қос азаматтық рұқсат етілетін елдердің тізімін дайындайды. Дегенмен, Ресей азаматтығы бұл тізімге енбейді. Сондай-ақ, Украина аумақтық тұтастығын мойындамайтын елдердің азаматтары да бұл құқықтан тыс қалады.
Жаңа заң ресейлік паспорт алғандар мен Ресей армиясында қызмет еткендерге Украина азаматтығын жоюды да қарастырады.
«Бізге оралғысы келетін азаматтар бар, бірақ бұл үшін Украинада өмір сүру шарттары өзге елдермен бәсекеге түсе алатындай болуы керек», – деді министр Чернышов.
Зеленский командасы бұл заң Украинаға экономикалық даму мен халық санын қалпына келтіруге серпін береді деп сенеді.