RUS
SMARTNEWS.KZ басылымының хабарлауынша, қазақстандық продюсер Баян Алагөзова ел ішінде жергілікті жұлдыздардың еңбегі әділ бағаланбайтынын айтты. Ол мұндай пікірін бұған дейін блогер Слава Нерушқа берген сұхбатында білдірген. Сұхбаттан үзінді продюсердің әлеуметтік желідегі парақшасында қайта жарияланды.
Алагөзованың айтуынша, кейбір тапсырыс берушілер Ресейден келген танымал тұлғаларға бірнеше есе жоғары ақы төлеуге дайын, ал қазақстандық әртістерге келгенде гонорарды төмендетуге тырысады.
«Бірде маған хабарласып: «Бүгін кешімізді Оксана Пушкина жүргізуі керек еді, бірақ келмейтін болды. Сіз келсеңіз» деді. Мен олардың Пушкинаға қанша төлеуі тиіс болғанын сұрадым – 25 мың доллар деді.
Сонда мен: «Осы сомаға келісемін» дедім. Олар үнсіз қалды. «Неге?» десем, «Сіз өзіміздікісіз ғой» дейді. Мен: «Сол себепті де дәл сондай гонорар талап етем. Мен Оксана Пушкинадан кем емеспін, неге 3 мың долларға келісуім керек?» дедім. Бұл әділетсіз әрі құрметсіздік», – деді продюсер.
Алагөзованың айтуынша, қазақстандық жұлдыздардың тіркелу мекенжайы Алматыда екені олардың кәсіби бағасын арзандатпауы керек.
«Менің де туфлиім Пушкинанікі секілді 2 мың доллар тұрады. Сонда мен неге одан арзан жұмыс істеуім керек?» – деді ол.
Продюсер шетелдік компаниялар да қазақстандық нарықтың көлемі шағын болғандықтан, отандық мамандардың еңбегін төмен бағалайтынын атап өтті. Оның пікірінше, мұндай көзқарас түбегейлі өзгеруі тиіс.