RUS
SMARTNEWS.KZ басылымының хабарлауынша, Өзбекстан астанасында екі жас жігіт түн ішінде iPhone сатылатын дүкенді тонап кетті. Олар 330 миллион сумнан астам сомаға бағаланған 41 ұялы телефонды ұрлап, таң ата сол құрылғыларды қара базарда 100 доллардан бастап сатып үлгерген. Бұл туралы Ташкент қалалық ІІД хабарлады.
Оқиға 19 маусымға қараған түні сағат 2:30 шамасында Чиланзар ауданында болған. Маска киген екі күдікті дүкеннің әйнек есігін таспен ұрып сындырған. Артынша арендалап алған болгарка арқылы сейфті бұзып, ішіндегі смартфондарды алып кеткен.
Таңертең дүкен қызметкері жағдайды көріп, полицияға жүгінген. Ұрлық бейнебақылау камераларына түсіп қалған.
Қалалық полицияның мәліметінше, ұрланған iPhone-дардың біразы таңғы сағаттарда-ақ қара нарықта сатылып кеткен. Біреуі небәрі 100 долларға, екіншісі 4,5 миллион сумға сатылған. Түскен қаражатты ұрылар теңдей бөлісіп алған.
Күдіктілердің бірі – бұған дейін үш рет ұрлық жасап, сотталған рецидивист. Ол ұсталып, қылмысты толық мойындап, ұрлықты қалай жоспарлағандарын егжей-тегжейлі айтып берген. Ал екінші күдікті – кәмелетке толмаған жасөспірім. Ол ата-анасының кепілдігімен үйіне жіберілген.
Қазір аталған факті бойынша Өзбекстан Қылмыстық кодексінің 169-бабы 4-бөлігі ("аса ірі көлемде жасалған ұрлық") бойынша іс қозғалды.