RUS
SMARTNEWS.KZ басылымының хабарлауынша, АҚШ әуе шабуылынан кейін Иранның Фордо ядролық кешеніне ауыр зақым келген. Бұл туралы Maxar компаниясы түсірген спутниктік суреттерге сүйенген бірқатар сарапшы мәлімдеді.
Суреттерде жерасты кешен орналасқан тау жотасының үстінде алты бірдей үлкен шұңқыр (воронка) анық көрінеді. Мамандар бұл жарылыстар нысанның негізгі құрылымына – уран байытатын центрифугалар орналасқан бөліктерге тікелей әсер етуі мүмкін деп болжайды.
Ядролық қару бойынша БҰҰ-ның бұрынғы инспекторы, қазір Вашингтондағы Ғылым және халықаралық қауіпсіздік институтын басқаратын Дэвид Олбрайт:
«Меніңше, бұл нысан толығымен жойылған болуы ықтимал», – деді.
АҚШ Қарулы күштері штабтар бастықтары комитетінің төрағасы Дэн Кейн де 22 маусымда журналистерге берген сұхбатында Фордо нысанына «өте ауыр зақым келгенін» растады. Алайда ол ядролық құрылғылардың нақты зақымдалғаны жөнінде пікір білдіруден бас тартты.
Ал Атом энергиясы жөніндегі халықаралық агенттік (МАГАТЭ) қазіргі уақытта Фордо кешеніндегі зақым көлеміне қатысты нақты дерек ұсынған жоқ. Агенттік тек 22 маусымда Ирандағы ядролық нысандарға жасалған соққыдан кейін радиация деңгейінің жоғарылау белгілері анықталмағанын хабарлаған.