RUS
SMARTNEWS.KZ басылымының хабарлауынша, белгілі композитор Ұлықпан Жолдасов жас әнші Садраддиннің шығармашылығына ашық наразылық білдірді. Ол Садраддин орындап жүрген ән мәтіндерінің мәнсіздігіне шүйлікті.
«Жүйке шыдамайды. Тыңдап отырған компьютерімді немесе құлаққабымды лақтырып жіберем. «Таңертең мас күйде, отырдым таксиге, анам мені күтеді асүйде» дейді. Не деген ән бұл?! Не сөз мынау?! Кейбір әндерде боқтық сөздер де бар. Солай атымды шығарам деп ойлай ма? Әннің де, өнердің де қадірін кетіріп бітті. Тыңдайтын ән қалмады. Әрине, жақсы әндер бар. Бірақ көбісі жақтарын шайнап айтады», – деді Жолдасов.
Желі қолданушылары сазгердің пікіріне екіұдай көзқарас танытты. Бірі оны қолдаса, енді бірі Садраддинді қорғап шықты.
«Өзінің қызы да мұрнымен ән айтып жүр», «Қазір бұл кісінің заманы өтті», «Садрға тиіспеңіздерші», «Шымкенттің салқын сырасы» деген әнді ұмытып кетті-ау», «Ағамыздың сөзі қызғаныш сияқты», - дейді жұрт.
Айта кетейік, Садраддин қазіргі жастар арасында кеңінен танымал әнші. Оның ерекше стилі мен лирикалық әуендері TikTok пен YouTube платформаларында миллиондаған тыңдалым жинаған.