RUS
SMARTNEWS.KZ басылымының хабарлауынша, Павлодар облысы Ақсу қаласында болған қайғылы оқиғада көз жұмған әйелдің отбасына жергілікті билік бір миллион теңгеге жуық әлеуметтік көмек бөлді.
19 маусым күні қатты дауыл кезінде ағаш бұтағы сынып, жол жиегінде кетіп бара жатқан таксидің алдыңғы терезесін тесіп өткен. Оқиға салдарынан көліктің алдыңғы орындығында отырған 1968 жылы туған жолаушы әйелдің кеудесіне бұтақ қадалып, оқиға орнында көз жұмған.
Марқұм — Ақсу қаласындағы №19 балабақшаның хореографы Марина Валерьевна Пахомова. 30 маусымда ол 57 жасқа толар еді. Артында кәмелетке толған үш ұлы мен бір немересі қалды.
Әлеуметтік желіде тараған ақпаратқа сәйкес, әйелдің отбасына жұмыс істеген уақыты үшін 310 мың теңге көлемінде өтемақы төленбек. Сонымен қатар, жерлеу рәсіміне 360 мың теңге бөлініп, туыстарын тасымалдау үшін автобус та берілген.
Жергілікті атқарушы органдардың мәліметінше, жалпы көмек көлемі 950–960 мың теңгеге жуықтаған.