RUS
SMARTNEWS.KZ басылымының хабарлауынша, Қазақстанда интернет алаяқтық пен киберқылмыстармен күрес күшейтілді. Бұл туралы ҚР Бас прокурорының орынбасары Жандос Өмірәлиев Kazinform агенттігінің BIZDIÑ ORTA подкастында мәлімдеді.
Оның айтуынша, соңғы жылдары қылмыстық әрекеттердің сипаты өзгеріп, күш қолдану орнына цифрлық құралдар арқылы жасалатын алаяқтық көбейген.
«Бұрын қылмыскерлер біреудің мүлкін күшпен тартып алатын болса, қазір олар смартфон мен компьютерді құрал ретінде пайдаланады. Интернет-алаяқтықтың түрі көбейіп барады. Бұл бағытта азаматтардың ақшасын жымқыру деректері аз емес», – деді Жандос Өмірәлиев.
Ресми мәліметке сәйкес, 2024–2025 жылдар аралығында 5 мыңнан астам адам қылмыстық жауапкершілікке тартылып, сотталған. Оның ішінде:
453 интернет-алаяқ,
85 киберқылмыстық топ,
200-ден астам дроппер анықталып, жауапқа тартылған.
«Дроппер деп алаяқтарға көмектесіп, өз шоттары мен банк карталарын пайдалануға берген азаматтарды айтамыз», – деп түсіндірді Бас прокурордың орынбасары.
Жандос Өмірәлиевтің айтуынша, ішкі істер органдары арнайы бөлімшелер құрып, бұл бағытта жұмыс жүргізіп жатыр. Прокуратура мен полиция бірлескен іс-шаралар арқылы интернет қылмыстармен күресті күшейткен.
Сонымен қатар, Парламентте заңнамаға өзгерістер енгізу мәселесі қарастырылуда. Онда байланыс операторлары мен банктердің жауапкершілігін арттыру ерекше назарда тұр.