RUS
SMARTNEWS.KZ басылымының хабарлауынша, Қазақстанда құқық қорғау органдары жасанды интеллект пен big data технологияларын өз жұмысында белсенді қолдана бастады. Бұл туралы ҚР Бас Прокурорының орынбасары Жандос Өмірәлиев Kazinform агенттігінің BIZDIÑ ORTA подкастында айтты.
Оның айтуынша, қазіргі уақытта жасанды интеллектіні енгізу бойынша пилоттық жоба іске қосылған.
«Жаңа жүйе, ең алдымен, қылмысты алдын ала анықтап, оның жолын кесуге бағытталған. Қаладағы кейбір бейнебақылау камераларына жасанды интеллект енгізілді. Ал камера орнатылмаған жерлерде дрондар көмектеседі. Бұл құрылғылар да жасанды интеллектпен жабдықталған», – деді Жандос Өмірәлиев.
Жасанды интеллект жүйесі:
бұзақылық әрекеттерді;
төбелесті;
қару ұстаған адамды автоматты түрде анықтап, дереу құқық қорғау органдарына хабар береді.
Сондай-ақ, жасанды интеллект іздеуде жүрген, пробацияда тіркеуде тұрған немесе үйқамақта отырған тұлғаларды бақылауға көмектеседі.
«Аталған азаматтардың тізімі цифрландырылып, жасанды интеллект жүйесіне енгізілген. Егер бұл адамдар көшеде жүрсе, бағдарлама бірден белгі береді», – деп түсіндірді Бас Прокурордың орынбасары.
Бұған дейін Жандос Өмірәлиев прокуратураның интернет-алаяқтықпен күрес, балалар үйлерін түнгі уақытта бақылау және әлеуметтік желілердегі резонанстық оқиғаларға ден қою сияқты жаңа тәсілдер жайында да мәлімдеген еді.