RUS
SMARTNEWS.KZ басылымының хабарлауынша, ҚР Бас Прокурорының орынбасары Жандос Өмірәлиев жастардың әлеуметтік желіде жалған ақпарат тарату жағдайлары жиі кездесетінін айтып, бұл әрекеттің заңмен жазаланатынын ескертті. Бұл туралы ол Kazinform агенттігінің BIZDIÑ ORTA подкастында мәлімдеді.
«Жастар, көбіне, білместікпен әлеуметтік желілерде жалған ақпарат таратып жатады. Бұл – заңмен тыйым салынған әрекет. Әкімшілік құқықбұзушылық туралы кодексте мұндай үшін айыппұл немесе әкімшілік қамау қарастырылған», – деді Жандос Өмірәлиев.
Оның сөзінше, егер таратылған жалған ақпарат ауыр салдарға әкелсе немесе азаматтардың құқықтарына елеулі зиян келтірсе, онда мұндай әрекет қылмыстық жауапкершілікке жатады.
«Ондай жағдайда 7 жылға дейін бас бостандығынан айыру жазасы тағайындалуы мүмкін», – деп нақтылады Бас прокурордың орынбасары.
Сондай-ақ, қоғамда арандату туғызу мақсатында ақпарат таратқандарға қатысты да жаза бар.
«Жалған немесе арандатушы сипаттағы ақпаратты прокуратура да, Ақпарат министрлігі де бақылап отырады. Сондықтан мен ақпараттық мәдениетті арттыруға шақырамын. Әсіресе, жастар бұл мәселеге өте мұқият қарауы керек. Өз парақшасына не жариялап жатқанын біліп отырмаған жастар көп. Бірақ бұл – жауапкершіліктен босатпайды», – деп ескертті Жандос Өмірәлиев.