RUS
SMARTNEWS.KZ басылымының хабарлауынша, Қазақстанда соңғы бес жыл ішінде қылмыс деңгейі айтарлықтай төмендеді. Бұл туралы Kazinform агенттігінің BIZDIÑ ORTA подкастында ҚР Бас Прокурорының орынбасары Жандос Өмірәлиев мәлімдеді.
«2019 жылы елімізде 280 мың қылмыс тіркелсе, 2024 жылы бұл көрсеткіш 133 мыңға дейін азайды. Бұл – үлкен жетістік», – деді ол.
Бас Прокурордың орынбасары атап өткендей, кісі өлтіру мен зорлық қылмыстары екі есе, тонау мен қарақшылық бес есе қысқарған.
«Дамыған елдерде қылмыс деңгейін бірқалыпты деңгейде ұстап тұрудың өзі оң көрсеткіш болып есептеледі. Ал бізде бұл көрсеткіштің едәуір қысқаруы – еліміздің дұрыс бағытта дамып жатқанын көрсетеді», – деді Жандос Өмірәлиев.
Оның айтуынша, мұндай нәтижеге қол жеткізу – тек құқық қорғау органдарының ғана емес, бүкіл мемлекеттік жүйенің және қоғамның ортақ еңбегі.
«Ең бастысы – халықтың құқықтық санасының артып келе жатқанын байқаймыз. Бұл – тұрақты, қауіпсіз қоғам құру жолындағы маңызды қадам», – деп түйіндеді Бас Прокурордың орынбасары.